http://www.youtube.com/watch?v=AZ8mrzSK ... gn'anno,il due novembre,c'é l'usanza\nper i defunti andare al Cimitero.\nOgnuno ll'adda fà chesta crianza;\nognuno adda tené chistu penziero.\nOgn'anno,puntualmente,in questo giorno,\ndi questa triste e mesta ricorrenza,\nanch'io ci vado,e con dei fiori adorno\nil loculo marmoreo 'e zi' Vicenza.\n\nSt'anno m'é capitato 'navventura...\ndopo di aver compiuto il triste omaggio.\nMadonna! si ce penzo,e che paura!,\nma po' facette un'anema e curaggio.\n\n'O fatto è chisto,statemi a sentire:\ns'avvicinava ll'ora d'à chiusura:\nio,tomo tomo,stavo per uscire\nbuttando un occhio a qualche sepoltura.\n\n"Qui dorme in pace il nobile marchese\nsignore di Rovigo e di Belluno\nardimentoso eroe di mille imprese\nmorto l'11 maggio del'31"\n\n'O stemma cu 'a curona 'ncoppa a tutto...\n...sotto 'na croce fatta 'e lampadine;\ntre mazze 'e rose cu 'na lista 'e lutto:\ncannele,cannelotte e sei lumine.\n\nProprio azzeccata 'a tomba 'e stu signore\nnce stava 'n 'ata tomba piccerella,\nabbandunata,senza manco un fiore;\npe' segno,sulamente 'na crucella.\n\nE ncoppa 'a croce appena se liggeva:\n"Esposito Gennaro - netturbino":\nguardannola,che ppena me faceva\nstu muorto senza manco nu lumino!\n\nQuesta è la vita! 'ncapo a me penzavo...\nchi ha avuto tanto e chi nun ave niente!\nStu povero maronna s'aspettava\nca pur all'atu munno era pezzente?\n\nMentre fantasticavo stu penziero,\ns'era ggià fatta quase mezanotte,\ne i'rimanette 'nchiuso priggiuniero,\nmuorto 'e paura...nnanze 'e cannelotte.\n\nTutto a 'nu tratto,che veco 'a luntano?\nDdoje ombre avvicenarse 'a parte mia...\nPenzaje:stu fatto a me mme pare strano...\nStongo scetato...dormo,o è fantasia?\n\nAte che fantasia;era 'o Marchese:\nc'o' tubbo,'a caramella e c'o' pastrano;\nchill'ato apriesso a isso un brutto arnese;\ntutto fetente e cu 'nascopa mmano.\n\nE chillo certamente è don Gennaro...\n'omuorto puveriello...'o scupatore.\n'Int 'a stu fatto i' nun ce veco chiaro:\nso' muorte e se ritirano a chest'ora?\n\nPutevano sta' 'a me quase 'nu palmo,\nquanno 'o Marchese se fermaje 'e botto,\ns'avota e tomo tomo..calmo calmo,\ndicette a don Gennaro:"Giovanotto!\n\nDa Voi vorrei saper,vile carogna,\ncon quale ardire e come avete osato\ndi farvi seppellir,per mia vergogna,\naccanto a me che sono blasonato!\n\nLa casta è casta e va,si,rispettata,\nma Voi perdeste il senso e la misura;\nla Vostra salma andava,si,inumata;\nma seppellita nella spazzatura!\n\nAncora oltre sopportar non posso\nla Vostra vicinanza puzzolente,\nfa d'uopo,quindi,che cerchiate un fosso\ntra i vostri pari,tra la vostra gente"\n\n"Signor Marchese,nun è colpa mia,\ni'nun v'avesse fatto chistu tuorto;\nmia moglie è stata a ffa' sta fesseria,\ni' che putevo fa' si ero muorto?\n\nSi fosse vivo ve farrei cuntento,\npigliasse 'a casciulella cu 'e qquatt'osse\ne proprio mo,obbj'...'nd'a stu mumento\nmme ne trasesse dinto a n'ata fossa".\n\n"E cosa aspetti,oh turpe malcreato,\nche l'ira mia raggiunga l'eccedenza?\nSe io non fossi stato un titolato\navrei già dato piglio alla violenza!"\n\n"Famme vedé..-piglia sta violenza...\n'A verità,Marché,mme so' scucciato\n'e te senti;e si perdo 'a pacienza,\nmme scordo ca so' muorto e so mazzate!...\n\nMa chi te cride d'essere...nu ddio?\nCcà dinto,'o vvuo capi,ca simmo eguale?...\n...Muorto si'tu e muorto so' pur'io;\nognuno comme a 'na'ato é tale e quale".\n\n"Lurido porco!...Come ti permetti\nparagonarti a me ch'ebbi natali\nillustri,nobilissimi e perfetti,\nda fare invidia a Principi Reali?".\n\n"Tu qua' Natale...Pasca e Ppifania!!!\nT''o vvuo' mettere 'ncapo...'int'a cervella \nche staje malato ancora e' fantasia?...\n'A morte 'o ssaje ched''e?...è una livella.\n\n'Nu rre,'nu maggistrato,'nu grand'ommo,\ntrasenno stu canciello ha fatt'o punto\nc'ha perzo tutto,'a vita e pure 'o nomme:\ntu nu t'hè fatto ancora chistu cunto?\n\nPerciò,stamme a ssenti...nun fa''o restivo,\nsuppuorteme vicino-che te 'mporta?\nSti ppagliacciate 'e ffanno sulo 'e vive:\nnuje simmo serie...appartenimmo à morte!"